Jumat, 07 Mei 2010

Baturai Pantun

BATURAI PANTUN
(Pakakas Manangkap Iwak)

Oleh: Ampeak Sie Kaminting Pidakan, Kalua


Subuh itu pina rami rucau di warung pambakal. Ada Julak Pirhan, Julak Adum, Julak Zaki, wan Julak Roni. Wan banyak lagi bubuhan kampung Jingah Rabit. Rame tatawaan, rame brokoan, rame bpandiran. Kada lawas mandarau tatawaan, lalu pambakal basuara, “Umai lah, barapa kilo saorang bajual iwak subuh tadi?”

Lalu Julak Pirhan manyahut, “Kada pang mun banyak, tahan gasan manyalukut muntung!”

Mandarau tatawaan nang lain. Kada lawas datang Julak Hirman ka warung, “Ae napa ne pina rame, pina nyaman dilihat?”

Lalu Julak Adum manyahut, “Kisah olehan iwak pang!”

Julak Hirman baucap, “Nah pas jua, kawa aku umpat manyambung, bajual jua subuh tadi.”

Lalu ae Julak Hirman mambuka pantun : Imbah dikupas dikumpulkan/ maulah mandai kulit tiwadak/ amun kada kalumpanan/ sambat pakakas manangkap iwak?

Julak Roni lalu manyahut : Wayah subuh basungsung bangun/ handak tulak ka banyiur/ tantaran panjang disambat unjun/ nang tahandap ngarannya banjur.

Julak Zaki umpat juwa : Batang rambai ditatak rata/ dibujurakan disusun susun/ bakajut ditimbai ngaranya lunta/ amun takait wani batajun.

Julak Adum kada mau kalah : Naik nyiur sambil bakadap/buahnya labat pitung tundunan/lukah, tangkalak, lawan sarakap/Manangkap iwak di pahumaan.


Julak Pirhan manyahut : Cacak basarang di buncu tawing/hintalunya banyak sampai guguran/ Hancau, hampang, suduk, tangkawing/ nang dipasang di susungaian.


Julak Zaki manyahut pulang : Limau kuit si limau purut/ Pisang manggala biginya hirang/ Lawan tangguk di banyu surut/ Iwak jauh disirapang.

(Mun ada sambungannya, sambungakan!)



Catatan:
Nah kaitu pang kabudayaan di kampung Jingah Rabit, budaya asli Banjar, budaya baturai pantun (batawak pantun ada jua nang manyambat ba adu pantun) Tapi zaman wahini budaya baturai pantun sudah jarang ditamukan. Terakhir nang unda tau, ngaranya di desa Pulau Damar Banjang wan Batu Mandi di wadahnya bini Julak Adum bagana masih dipakai urang waktu banikahan. (Pitua: Mun kita saing manggaduh, kada pacang Banjar hilang di bumi).

Tidak ada komentar:

Posting Komentar